Диакон: Благослови, владыко.
Священник: Благословенно Царство Отца и Сына и Святаго Духа, ныне и присно и во веки веков.
Лик: Аминь
Диакон: Миром Господу помолимся.
Лик: Господи помилуй.
Диакон: О свышнем мире и спасении душ наших, Господу помолимся.
Лик: Господи помилуй.
Диакон: О мире всего мира, благостоянии Святых Божиих Церквей и соединении всех, Господу помолимся.
Лик: Господи помилуй.
Диакон: О святем храме сем и с верою, благоговением и страхом Божиим входящих вонь, Господу помолимся.
Лик: Господи помилуй.
Диакон: О Великом Господине и Отце нашем Святейшем Патриархе имярек, и о Господине нашем, (Высоко)преосвященнейшем имярек, честнем пресвитерстве, во Христе диаконстве, о всем причте и людех, Господу помолимся.
Лик: Господи помилуй.
Диакон: О Богохранимей стране нашей, властех и воинстве ея, Господу помолимся.
Лик: Господи помилуй.
Диакон: О граде сем, всяком граде, стране и верою живущих в них, Господу помолимся.
Лик: Господи помилуй.
Диакон: О благорастворении воздухов, о изобилии плодов земных и временех мирных, Господу помолимся.
Лик: Господи помилуй.
Диакон: О плавающих, путешествующих, недугующих, страждущих, плененных и о спасении их, Господу помолимся.
Лик: Господи помилуй.
Диакон: О избавитися нам от всякия скорби, гнева и нужды, Господу помолимся.
Лик: Господи помилуй.
Диакон: Заступи, спаси, помилуй и сохрани нас, Боже, Твоею благодатию.
Лик: Господи помилуй.
Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Лик: Тебе, Господи.
Священник глаголет тайно молитву перваго антифона:
Господи Боже наш, Егоже держава несказанна и слава непостижима, Егоже милость безмерна и человеколюбие неизреченно; Сам, Владыко, по благоутробию Твоему, призри на ны и на святый храм сей, и сотвори с нами, и молящимися с нами, богатыя милости Твоя и щедроты Твоя.
Священник возглашает: Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков.
Лик: Аминь.
Лик: Благослови, душе моя, Господа./ Благословен еси, Господи./ Благослови, душе моя, Господа,/ и вся внутренняя моя Имя святое Его./ Благослови, душе моя, Господа,/ и не забывай всех воздаяний Его./ Очищающаго вся беззакония твоя,/ исцеляющаго вся недуги твоя./ Избавляющаго от истления живот твой,/ венчающаго тя милостию и щедротами./ Щедр и милостив Господь,/ долготерпелив и многомилостив./ Благослови, душе моя, Господа,/ и вся внутреняя моя,/ Имя святое Его./ Благословен еси Господи.
Диакон: Паки и паки миром Господу помолимся.
Лик: Господи, помилуй.
Диакон: Заступи, спаси, помилуй и сохрани нас, Боже, Твоею благодатию.
Лик: Господи, помилуй.
Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Лик: Тебе, Господи.
Священник тайно глаголет молитву втораго антифона:
Господи Боже наш, спаси люди Твоя и благослови достояние Твое, исполнение Церкве Твоея сохрани, освяти любящыя благолепие дому Твоего; Ты тех воспрослави Божественною Твоею силою, и не остави нас, уповающих на Тя,
Священник возглашает: Яко Твоя держава, и Твое есть Царство, и сила, и слава, Отца и Сына и Святаго Духа, ныне и присно и во веки веков.
Лик: Аминь.
Лик: Хвали, душе моя, Господа./ Восхвалю Господа в животе моем,/ пою Богу моему, дондеже есмь./ Не надейтеся на князи, на сыны человеческия, в нихже несть спасения./ Изыдет дух его,/ и возвратится в землю свою:/ в той день погибнут вся помышления его./ Блажен, емуже Бог Иаковль помощник его,/ упование его на Господа Бога своего./ Сотворшаго небо и землю,/ море и вся яже в них./ Хранящаго истину в век,/ творящаго суд обидимым,/ дающаго пищу алчущим./ Господь решит окованныя,/ Господь умудряет слепцы./ Господь возводит низверженныя,/ Господь любит праведники./ Господь хранит пришельцы,/ сира и вдову приимет,/ и путь грешных погубит./ Воцарится Господь во век,/ Бог твой, Сионе, в род и род.
Слава Отцу и Сыну и Святому Духу и ныне и присно и во веки веков. Аминь.
Единородный Сыне и Слове Божий, Безсмертен Сый,/ и изволивый спасения нашего ради/ воплотитися от Святыя Богородицы и Приснодевы Марии,/ непреложно вочеловечивыйся;/ распныйся же Христе Боже, смертию смерть поправый,/ един Сый Святыя Троицы,/ спрославляемый Отцу и Святому Духу, спаси нас.
Диакон: Паки и паки миром Господу помолимся.
Лик: Господи, помилуй.
Диакон: Заступи, спаси, помилуй и сохрани нас, Боже, Твоею благодатию.
Лик: Господи, помилуй.
Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Лик: Тебе, Господи.
Молитва третияго антифона:
Иже общия сия и согласныя даровавый нам молитвы, Иже и двема, или трем, согласующимся о имени Твоем, прошения подати обещавый, Сам и ныне раб Твоих прошения к полезному исполни, подая нам и в настоящем веце познание Твоея истины, и в будущем живот вечный даруя,
Священник возглашает: Яко Благ и Человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
Лик: Во царствии Твоем помяни нас, Господи,/ егда приидеши во Царствии Твоем.
Блажени нищии духом,/ яко тех есть Царство Небесное.
Блажени плачущии,/ яко тии утешатся.
Блажени кротции,/ яко тии наследят землю.
Блажени алчущии и жаждущии правды,/ яко тии насытятся.
Блажени милостивии,/ яко тии помиловани будут.
Блажени чистии сердцем,/ яко тии Бога узрят.
Блажени миротворцы,/ яко тии сынове Божии нарекутся.
Блажени изгнани правды ради,/ яко тех есть Царство Небесное.
Блажени есте, егда поносят вам, и изженут,/ и рекут всяк зол глагол на вы лжуще Мене ради.
Радуйтеся и веселитеся,/ яко мзда ваша многа на небесех.
Диакон тихо: Господу помолимся.
Священник глаголет молитву входа: Владыко Господи Боже наш, уставивый на небесех чины и воинства ангел и архангел, в служение Твоея славы; сотвори со входом нашим входу святых ангелов быти, сослужащих нам и сославословящих Твою благость. Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков. Аминь.
Диакон: Благослови, владыко, святый вход.
Священник: Благословен вход святых твоих, всегда, ныне и присно и во веки веков.
Диакон: Премудрость, прости.
Лик: Приидите, поклонимся и припадем ко Христу. Спаси ны, Сыне Божий, во святых дивен Сый (в воскресенье: воскресый из мертвых, в богородичные праздники: молитвами Богородицы), поющия Ти: аллилуиа.
Священник тихо чтет молитву трисвятаго пения: Боже святый, Иже во святых почиваяй, Иже трисвятым гласом от серафимов воспеваемый, и от херувимов славословимый, и от всякия небесныя силы поклоняемый, Иже от небытия во еже быти приведый всяческая, создавый человека по образу Твоему и по подобию, и всяким Твоим дарованием украсивый, даяй просящему премудрость и разум, и не презираяй согрешающего, но полагаяй на спасение покаяние: сподобивый нас, смиренных и недостойных раб Твоих, и в час сей стати пред славою святаго Твоего жертвенника, и должное Тебе поклонение и славословие приносити; Сам, Владыко, приими и от уст нас грешных трисвятую песнь и посети ны благостию Твоею; прости нам всякое согрешение, вольное же и невольное, освяти наша души и телеса, и даждь нам в преподобии служити Тебе вся дни живота нашего, молитвами Святыя Богородицы и всех святых, от века Тебе благоугодивших.
Диакон: Благослови, владыко, время трисвятаго
Диакон: Господу помолимся.
Лик: Господи, помилуй.
Священник: Яко свят еси, Боже наш, и Тебе славу возсылаем, Отцу и Сыну и Святому Духу, ныне и присно
Диакон: Господи, спаси благочестивыя, и услыши ны.
Лик: Господи, спаси благочестивыя, и услыши ны.
Диакон: И во веки веков.
Лик: Аминь. Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Святый Безсмертный, помилуй нас.
Святый Боже, Святый Крепкий, Святый Безсмертный, помилуй нас.
Диакон: Повели, владыко.
Священник: Благословен грядый во имя Господне.
Диакон, указуя на Горнее место: Благослови, владыко, горний престол.
Иерей же: Благословен еси на престоле Царствия Твоего, седяй на херувимех, всегда, ныне и присно и вовеки веков.
Диакон: Вонмем.
Священник: Мир всем.
Чтец: И духови твоему.
Диакон: Премудрость.
Чтец: Прокимен, глас…возглашает прокимен со стихами его
Лик: Пропевает прокимен 2,5 раза
Диакон: Премудрость.
Чтец: Деяний святых апостол (или: Соборнаго послания Петрова, К коринфяном послания святаго апостола Павла, и т.п.) чтение.
Диакон: Вонмем.
Священник: Мир ти.
Чтец: И духови твоему.
Диакон: Премудрость.
Чтец: Аллилуиа, глас...и возглашает аллилуарий
Лик: Аллилуиа (трижды после каждого стиха аллилуария).
Священник, стоя перед святою трапезою, глаголет молитву сию, прежде Евангелия: Возсияй в сердцах наших, Человеколюбче Владыко, Твоего богоразумия нетленный свет, и мысленныя наши отверзи очи во евангельских Твоих проповеданий разумение, вложи в нас и страх Блаженных Твоих заповедей, да плотския похоти вся поправше, духовное жительство пройдем, вся, яже ко благоугождению Твоему, и мудрствующе и деюще. Ты бо еси просвещение душ и телес наших, Христе Боже, и Тебе славу возсылаем, со безначальным Твоим Отцем, и всесвятым и благим и животворящим Твоим Духом, ныне и присно и во веки веков. Аминь.
Диакон: Благослови, владыко, благовестителя святаго апостола и евангелиста имярек
Священник: Бог, молитвами святаго, славнаго, всехвальнаго апостола и евангелиста имярек да даст тебе глагол, благовествующему силою многою, во исполнение Евангелиа Возлюбленнаго Сына Своего, Господа нашего Иисуса Христа.
Диакон: Аминь.
Второй диакон или священник: Премудрость, прости, услышим святаго Евангелиа.
Священник: Мир всем.
Лик: И духови твоему.
Диакон: От имярек святаго Евангелиа чтение.
Лик: Слава Тебе, Господи, слава Тебе.
Второй диакон или священник: Вонмем.
Священник: Мир ти, благовествующему.
Лик: Слава Тебе, Господи, слава Тебе.
Диакон: Рцем вси от всея души, и от всего помышления нашего рцем.
Лик: Господи помилуй.
Диакон: Господи Вседержителю, Боже отец наших, молим Ти ся, услыши и помилуй.
Лик: Господи помилуй.
Диакон: Помилуй нас, Боже, по велицей милости Твоей, молим Ти ся, услыши и помилуй.
Лик: Господи помилуй (Трижды).
Священник тихо глаголет молитву прилежнаго моления: Господи Боже наш, прилежное сие моление приими от Твоих раб, и помилуй нас по множеству милости Твоея, и щедроты Твоя низпосли на ны и на вся люди Твоя, чающия от Тебе богатыя милости.
Диакон: Еще молимся о Великом Господине и Отце нашем Святейшем Патриархе имярек, и о Господине нашем, (Высоко)преосвященнейшем имярек, и всей во Христе братии нашей.
Лик: Господи помилуй (Трижды).
Диакон: Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.
Лик: Господи помилуй (Трижды).
Диакон: Еще молимся о братиях наших, священницех, священномонасех и всем во Христе братстве нашем.
Лик: Господи помилуй (Трижды).
Диакон: Еще молимся о блаженных и приснопамятных святейших патриарсех православных, и создателех святаго храма сего, и о всех преждепочивших отцех и братиях, зде лежащих и повсюду, православных.
Лик: Господи помилуй (Трижды).
Диакон: Еще молимся о милости, жизни, мире, здравии, спасении, посещении, прощении и оставлении грехов рабов божиих, братии святаго храма сего.
Лик: Господи помилуй (Трижды).
Диакон: Еще молимся о плодоносящих и добродеющих во святем и всечестнем храме сем, труждающихся, поющих и предстоящих людех, ожидающих от Тебе великия и богатыя милости.
Лик: Господи помилуй (Трижды).
Священник: Яко милостив и Человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
Диакон: Помилуй нас, Боже, по велицей милости Твоей, молим Ти ся, услыши и помилуй.
Лик: Господи помилуй (Трижды).
Диакон: Еще молимся о упокоении душ усопших рабов Божиих (имена) и о еже проститися им всякому прегрешению, вольному же и невольному.
Лик: Господи помилуй (Трижды).
Диакон: Яко да Господь Бог учинит души их, идеже праведнии упокояются.
Лик: Господи помилуй (Трижды).
Диакон: Милости Божия, Царства Небеснаго и оставления грехов их у Христа, Безсмертнаго Царя и Бога нашего, просим.
Лик: Подай, Господи.
Диакон: Господу помолимся.
Лик: Господи, помилуй.
Священник молится тихо: Боже духов и всякия плоти, смерть поправый и диавола упразднивый, и живот миру Твоему даровавый, Сам, Господи, покой души усопших раб Твоих имярек в месте светле, в месте злачне, в месте покойне, отнюдуже отбеже болезнь, печаль и воздыхание; всякое согрешение, содеянное ими словом или делом, или помышлением, яко благий Человеколюбец Бог прости, яко несть человек, иже жив будет и не согрешит, Ты бо един токмо без греха, правда Твоя правда во веки, и слово Твое истина.
Священник возглашает: Яко Ты еси воскресение, и живот, и покой усопших раб Твоих Христе Боже наш, и тебе славу возсылаем, со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков.
Лик: Аминь.
Диакон: Помолитеся, оглашении, Господеви.
Лик: Господи, помилуй.
Диакон: Вернии, о оглашенных помолимся, Да Господь помилует их.
Лик: Господи, помилуй.
Диакон: Огласит их словом истины.
Лик: Господи, помилуй.
Диакон: Открыет им Евангелие правды.
Лик: Господи, помилуй.
Диакон: Соединит их Святей Своей, Соборней и Апостольстей Церкви.
Лик: Господи, помилуй.
Диакон: Спаси, помилуй, заступи и сохрани их, Боже, Твоею благодатию.
Лик: Господи, помилуй.
Диакон: Оглашении, главы ваша Господеви приклоните.
Лик: Тебе, Господи.
Молитва о оглашенных: Господи Боже наш, Иже на высоких живый и на смиренныя призираяй, Иже спасение роду человеческому низпославый, Единородного Сына Твоего и Бога, Господа нашего Иисуса Христа; призри на рабы Твоя оглашенныя, подклоньшыя Тебе своя выя, и сподоби я во время благополучное бани пакибытия, оставления грехов и одежди нетления, соедини их святей Твоей, Соборней и Апостольстей Церкви и сопричти их избранному Твоему стаду.
Возглашение священника: Да и тии с нами славят пречестное и великолепое Имя Твое, Отца и Сына и Святаго Духа, ныне и присно и во веки веков.
Лик: Аминь.
Диакон: Елицы оглашеннии, изыдите, оглашеннии, изыдите; елицы оглашеннии, изыдите. Да никто от оглашенных, елицы вернии, паки и паки миром Господу помолимся.
Лик: Господи, помилуй.
Молитва верных первая: Благодарим Тя, Господи Боже сил, сподобившаго нас предстати и ныне святому Твоему жертвеннику и припасти ко щедротам Твоим о наших гресех и о людских неведениих. Приими, Боже, моление наше, сотвори ны достойны быти, еже приносити Тебе моления и мольбы, и жертвы безкровныя о всех людех Твоих, и удовли нас, ихже положил еси в службу Твою сию, силою Духа Твоего Святаго, неосужденно и непреткновенно, в чистем свидетельстве совести нашея, призывати Тя на всякое время и место; да послушая нас, милостив нам будеши, во множестве Твоея благости.
Диакон: Заступи, спаси, помилуй и сохрани нас, Боже, Твоею благодатию.
Лик: Господи, помилуй.
Диакон: Премудрость.
Священник: Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков.
Лик: Аминь.
Диакон: Паки и паки миром Господу помолимся.
Лик: Господи, помилуй.
Диакон: О свышнем мире и спасении душ наших, Господу помолимся.
Лик: Господи, помилуй.
Диакон: О мире всего мира, благостоянии святых Божиих Церквей и соединении всех, Господу помолимся.
Лик: Господи, помилуй.
Диакон: О святем храме сем и с верою, благоговением и страхом Божиим входящих в онь, Господу помолимся.
Лик: Господи, помилуй.
Диакон: О избавитися нам от всякия скорби, гнева и нужды, Господу помолимся.
Лик: Господи, помилуй.
Молитва верных вторая: Паки, и многажды Тебе припадаем, и Тебе молимся, Благий и Человеколюбче, яко да призрев на моление наше, очистиши наша души и телеса от всякия скверны плоти и духа, и даси нам неповинное и неосужденное предстояние святаго Твоего жертвенника. Даруй же, Боже, и молящимся с нами преспеяние жития и веры и разума духовного; даждь им всегда со страхом и любовию служащым Тебе, неповинно и неосужденно причаститися святых Твоих Таин, и небесного Твоего Царствия сподобитися.
Диакон: Заступи, спаси, помилуй и сохрани нас, Боже, Твоею благодатию.
Лик: Господи, помилуй.
Диакон: Премудрость.
Священник: Яко да под державою Твоею всегда храними, Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
Лик: Иже Херувимы тайно образующе и Животворящей Троице Трисвятую песнь припевающе, всякое ныне житейское отложим попечение.
Таже, херувимстей песни певаемей, диакон кадит, священник же глаголет тайно молитву сию: Никтоже достоин от связавшихся плотскими похотьми и сластьми приходити, или приближитися, или служити Тебе, Царю славы. Еже бо служити Тебе, велико и страшно и самем небесным силам. Но обаче, неизреченнаго ради и безмернаго Твоего человеколюбия, непреложно и неизменно был еси человек, и архиерей нам был еси, и служебныя сея и безкровныя жертвы священнодействие предал еси нам, яко Владыка всех. Ты бо Един, Господи Боже наш, владычествуеши небесными и земными, Иже на престоле херувимсте носимый, Иже серафимов Господь и Царь Израилев, Иже Един свят и во святых почиваяй. Тя убо молю единаго благаго и благопослушливаго: призри на мя, грешнаго и напотребнаго раба Твоего, и очисти мою душу и сердце от совести лукавыя, и удовли мя силою Святаго Твоего Духа, облеченна благодатию священства, предстати святей Твоей сей трапезе и священнодействовати святое и пречистое Твое тело и честную кровь; к Тебе бо прихожду, приклонь мою выю, и молю Ти ся, да не отвратиши лица Твоего от мене, ниже отринеши мене от отрок Твоих, но сподоби принесенным Тебе быти, мною грешным и недостойным рабом Твоим, даром сим; Ты бо еси приносяй и приносимый, и приемляй и раздаваемый, Христе Боже наш, и Тебе славу воссылаем со Безначальным Твоим Отцем, и Пресвятым, и Благим, и Животворящим Твоим Духом, ныне и присно и во веки веков. Аминь.
Затем священнослужители трижды читают херувимскую песнь и отходят в предложение.
И кадит иерей святая, в себе моляся: Боже, очисти мя грешнаго.
Диакон: Возми, владыко.
Священник, возлагая воздух на плечо дьякона: Возмите руки ваша во святая и благословите Господа.
Священник поставляет дискос на главу диакона, сам берет потир и они выходят на солею.
Диакон: Великаго Господина и Отца нашего имярек, Святейшего Патриарха Московского и всея Руси, и Господина нашего (Высоко)преосвященнейшаго имярек, да помянет Господь Бог во Царствии Своем, всегда, ныне и присно и во веки веков.
Священник: Преосвященныя митрополиты, архиепископы и епископы, и весь священнический и монашеский чин, и причет святаго храма сего, и всех вас православных христиан да помянет Господь Бог во Царствии Своем, всегда, ныне и присно и во веки веков.
Лик: Аминь. Яко да Царя всех подымем, ангельскими невидимо дориносима чинми. Аллилуиа, аллилуиа, аллилуиа.
Когда священник входит в алтарь, диакон говорит: Да помянет Господь Бог священство твое во царствии Своем.
И священник к нему: Да помянет Господь Бог священнодиаконство твое во царствии Своем, всегда, ныне и присно и во веки веков.
Поставив же потир и дискос на престол, священник читает: Благообразный Иосиф с древа снем пречистое тело Твое, плащаницею чистою обвив, и благоуханьми во гробе нове покрыв положи.
Во гробе плотски, во аде же с душею яко Бог, в раи же с разбойником, и на престоле был еси, Христе, со Отцем и Духом, вся исполняяй неописанный.
Яко живоносец, яко рая краснейший, воистину и чертога всякаго царскаго показася светлейший, Христе, гроб Твой, источник нашего воскресения.
Покадив воздух и покрывая им Дары, священник снова читает "Благообразный Иосиф...". Затем, кадя покрытые Дары, читает: Ублажи, Господи, благоволением Твоим Сиона, и да созиждутся стены Иерусалимския, тогда благоволиши жертву правды, всесожжения и всесожигаемая, тогда возложат на олтарь Твой тельцы.
И отдав кадильницу, приклонив главу, глаголет диакону: Помяни мя, брате и сослужителю.
Диакон: Да помянет Господь Бог священство твое во царствии Своем. Помолися о мне, владыко святый.
Священник: Дух Святый найдет на тя и сила Вышняго осенит тя.
Диакон: Той же Дух содействует нам вся дни живота нашего. Помяни мя, владыко святый.
Священник: Да помянет тя Господь Бог во царствии Своем, всегда, ныне и присно и во веки веков.
Диакон: Аминь.
Диакон: Исполним молитву нашу Господеви.
Лик: Господи, помилуй
Диакон: О предложенных честных Дарех, Господу помолимся.
Лик: Господи, помилуй
Диакон: О святем храме сем и с верою, благоговением и страхом Божиим входящих в онь, Господу помолимся.
Лик: Господи, помилуй
Диакон: О избавитися нам от всякия скорби, гнева и нужды, Господу помолимся.
Лик: Господи, помилуй
Молитва приношения по поставлении Божественных даров на святей трапезе: Господи Боже Вседержителю, Едине святе, приемляй жертву хваления от призывающих Тя всем сердцем, приими и нас грешных моление, и принеси ко святому Твоему жертвеннику, и удовли нас приносити Тебе дары же и жертвы духовныя о наших гресех и о людских неведениих; и сподоби нас обрести благодать пред Тобою, еже быти Тебе благоприятней жертве нашей, и вселитися Духу благодати Твоея благому в нас, и на предлежащих дарех сих, и на всех людех Твоих.
Диакон: Заступи, спаси, помилуй и сохрани нас, Боже, Твоею благодатию.
Лик: Господи, помилуй
Диакон: Дне всего совершенна, свята, мирна и безгрешна, у Господа просим.
Лик: Подай, Господи.
Диакон: Ангела мирна, верна наставника, хранителя душ и телес наших, у Господа просим.
Лик: Подай, Господи.
Диакон: Прощения и оставления грехов и прегрешений наших, у Господа просим.
Лик: Подай, Господи.
Диакон: Добрых и полезных душам нашим и мира мирови, у Господа просим.
Лик: Подай, Господи.
Диакон: Прочее время живота нашего в мире и покаянии скончати, у Господа просим.
Лик: Подай, Господи.
Диакон: Христианския кончины живота нашего, безболезнены, непостыдны, мирны, и добраго ответа на Страшнем Судищи Христове, просим.
Лик: Подай, Господи.
Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Лик: Тебе, Господи.
Священник: Щедротами Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно и во веки веков.
Лик: Аминь.
Священник: Мир всем.
Лик: И духови твоему.
Диакон: Возлюбим друг друга, да единомыслием исповемы.
Лик: Отца и Сына и Святаго Духа, Троицу Единосущную и Нераздельную.
Диакон: Двери, двери, премудростию вонмем.
Лик: Верую во Единаго Бога Отца Вседержителя, Творца небу и земли, видимим же всем и невидимым. И во Единаго Господа Иисуса Христа, Сына Божия, Единароднаго, Иже от Отца рожденнаго прежде всех век. Света от Света, Бога истинна от Бога истинна, рожденна, несотворенна, Единосущна Отцу, Имже вся быша. Нас ради, человек, и нашего ради спасения сшедшаго с Небес, и воплотившагося от Духа Свята и Марии Девы, И вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И восшедшаго на Небеса, и седяща одесную Отца. И паки грядущаго со славою судити живым и мертвым, Его же Царствию не будет конца. И в Духа Святаго, Господа Животворящаго, Иже от Отца исходящаго, Иже со Отцем и Сыном спокланяема и сславима, глаголавшаго пророки. Во едину Святую Соборную и Апостольскую Церковь. Исповедую едино Крещение во оставление грехов. Чаю воскресения мертвых, и жизни будущаго века. Аминь.
Диакон: Станем добре, станем со страхом, вонмем, Святое Возношение в мире приносити.
Лик: Милость мира, Жертву хваления.
Священник: Благодать Господа нашего Иисуса Христа, и любы Бога и Отца, и причастие Святаго Духа, буди со всеми вами.
Лик: И со духом твоим.
Священник: Горе имеим сердца.
Лик: Имамы ко Господу.
Священник: Благодарим Господа.
Лик: Достойно и праведно есть покланятися Отцу и Сыну и Святому Духу, Троице Единосущней и Нераздельней.
Священник же молится: Достойно и праведно Тя пети, Тя благословити, Тя хвалити, Тя благодарити, Тебе покланятися на всяком месте владычествия Твоего; Ты бо еси Бог неизреченен, недоведомь, невидимь, непостижимь, присно сый, такожде сый, Ты и Единородный Твой Сын, и Дух Твой Святый; Ты из небытия в бытие нас привел еси, и отпадшыя возставил еси паки, и не отступил еси вся творя, дондеже нас на небо возвел еси, и царство Твое даровал еси будущее. О сих всех благодарим Тя, и Единороднаго Твоего Сына, и Духа Твоего Святаго, о всех, ихже вемы и ихже не вемы, явленных и неявленных благодеяниих бывших на нас. Благодарим Тя и о службе сей, юже от рук наших прияти изволил еси, аще и предстоят Тебе тысящи архангелов и тьмы ангелов, херувими и серафими, шестокрилатии, многоочитии, возвышающиися пернатии.
Священник возглашает: Победную песнь поюще, вопиюще, взывающе и глаголюще.
Лик: Свят, Свят, Свят Господь Саваоф, исполнь Небо и земля славы Твоея; осанна в вышних, благословен Грядый во Имя Господне, осанна в вышних.
Священник молится: С сими и мы блаженными силами, Владыко Человеколюбче, вопием и глаголем: Свят еси и Пресвят, Ты, и Единородный Твой Сын, и Дух Твой Святый; Свят еси и Пресвят, и великолепна слава Твоя, Иже мир Твой тако возлюбил еси, якоже Сына Твоего Единороднаго дати, да всяк веруяй в него не погибнет, но имать живот вечный; Иже пришед и все еже о нас смотрение исполнив, в нощь, в нюже предаяшеся, паче же Сам Себе предаяше, за мирский живот, приемь хлеб во святыя Своя и пречистыя и непорочныя руки, благодарив и благословив, освятив, преломив, даде святым Своим учеником и апостолом, рек:
Священник озглашает: Приимите, ядите, Сие есть Тело Мое, еже за вы ломимое во оставление грехов.
Лик: Аминь.
Священник тайно: Подобне и чашу по вечери, глаголя:
Священник возгласно: Пийте от нея вси, сия есть Кровь Моя Новаго Завета, яже за вы и за многи изливаемая во оставление грехов.
Лик: Аминь.
Священник молится: Поминающе убо спасительную сию заповедь, и вся, яже о нас бывшая: крест, гроб, тридневное воскресение, на небеса восхождение, одесную седение, второе и славное паки пришествие.
Священник возглашает: Твоя от Твоих Тебе приносяще о всех и за вся.
Лик: Тебе поем, Тебе благословим, Тебе благодарим, Господи, и молим Ти ся, Боже наш.
Священник же молится: Еще приносим Ти словесную сию и безкровную службу, и просим, и молим, и мили ся деем, низпосли Духа Твоего Святаго на ны, и на предлежащыя дары сия.
Диакон: Благослови, владыко, святый хлеб.
Священник знаменует святый хлеб, глаголя: И сотвори убо хлеб сей, честное Тело Христа Твоего.
Диакон: Аминь. Благослови, владыко, святую чашу.
И священник благословляя глаголет: А еже в чаше сей, честную кровь Христа Твоего.
Диакон: Аминь. Благослови, владыко, обоя.
Священник: Преложив Духом Твоим Святым.
Диакон: Аминь. Аминь. Аминь. Помяни мя, святый владыко, грешнаго.
Священник: Да помянет тя Господь Бог во царствии Своем, всегда, ныне и присно и во веки веков.
Диакон: Аминь.
Священник же молится: Якоже быти причащающимся, во трезвение души, во оставление грехов, в приобщение Святаго Твоего Духа, во исполнение Царствия Небеснаго, в дерзновение еже к Тебе, не в суд или во осуждение.
Еще приносим Ти словесную сию службу, о иже в вере почивших, праотцех, отцех, патриарсех, пророцех, апостолех, проповедницех, евангелистех, мученицех, исповедницех, воздержницех, и о всяком дусе праведнем в вере скончавшемся.
Священник: Изрядно о Пресвятей, Пречистей, Преблагословенней, Славней Владычице нашей Богородице и Приснодеве Марии.
Лик: Достойно есть, яко воистинну блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и Славнейшую без сравнения Серафим, без истления Бога Слова рождшую, сущую Богородицу Тя величаем.
Священник молится: О святем Иоанне пророце, предтечи и крестители, о святых славных и всехвальных апостолех, о святем имярек, егоже и память совершаем, и о всех сятых Твоих, ихже молитвами посети нас, Боже.
И помяни всех усопших о надежди воскресения жизни веяныя, и упокой их, идеже присещает свет лица Твоего.
Еще молим Тя, помяни, Господи, всякое епископство православных, право правящих слово Твоея истины, всякое пресвитерство, во Христе диаконство, и всякий священнический чин.
Еще приносим Ти словесную сию службу, о вселенней, о святей соборней и апостольстей Церкви, о иже в чистоте и честнем жительстве пребывающих, о богохранимей стране нашей, властех и воинстве ея. Даждь им, Господи, мирное правление, да и мы в тишине их тихое и безмолвное житие поживем, во всяком благочестии и чистоте.
Священник: В первых помяни, Господи, Великаго Господина и Отца нашего имярек, Святейшаго Патриарха Московскаго и всея Руси, и Господина нашего (Высоко)преосвященнейшаго имярек, ихже даруй святым Твоим Церквам в мире, целых, честных, здравых, долгоденствующих, право правящих слово Твоея истины.
Лик: И всех и вся.
Священник молится: Помяни, Господи, град сей, в немже живем, и всякий град и страну, и верою живущих в них. Помяни, Господи, плавающих, путешествующих, недугующих, страждущих, плененных, и спасение их. Помяни, Господи, плодоносящих и добротворящих во святых Твоих Церквах, и поминающих убогия, и на вся ны милости Твоя низпосли.
Священник: И даждь нам едиными усты и единым сердцем славити и воспевати Пречестное и Великолепое Имя Твое, Отца и Сына и Святаго Духа, ныне и присно и во веки веков.
Лик: Аминь.
Священник: И да будут милости Великаго Бога и Спаса нашего Иисуса Христа со всеми вами.
Лик: И со духом твоим.
Диакон: Вся святыя помянувше, паки и паки миром Господу помолимся.
Лик: Господи, помилуй.
Диакон: О принесенных и освященных Честных Дарех, Господу помолимся.
Лик: Господи, помилуй.
Диакон: Яко да Человеколюбец Бог наш, прием я во святый, и принебесный, и мысленный Свой Жертвенник, в воню благоухания духовнаго, возниспослет нам Божественную благодать и дар Святаго Духа, помолимся.
Лик: Господи, помилуй.
Диакон: О избавитися нам от всякия скорби, гнева и нужды, Господу помолимся.
Лик: Господи, помилуй.
Священник же молится: Тебе предлагаем живот наш весь и надежду, Владыко Человеколюбче, и просим, и молим, и мили ся деем: сподоби нас причаститися небесных Твоих и страшных Таин, сея священныя и духовныя трапезы, с чистою совестию, во оставление грехов, в прощение согрешений, во общение Духа Святаго, в наследие Царствия Небеснаго, в дерзновение еже к Тебе, не в суд или во осуждение.
Диакон: Заступи, спаси, помилуй и сохрани нас, Боже, Твоею благодатию.
Лик: Господи, помилуй.
Диакон: Дне всего совершенна, свята, мирна и безгрешна, у Господа просим.
Лик: Подай, Господи.
Диакон: Ангела мирна, верна наставника, хранителя душ и телес наших, у Господа просим.
Лик: Подай, Господи.
Диакон: Прощения и оставления грехов и прегрешений наших, у Господа просим.
Лик: Подай, Господи.
Диакон: Добрых и полезных душам нашим и мира мирови, у Господа просим.
Лик: Подай, Господи.
Диакон: Прочее время живота нашего в мире и покаянии скончати, у Господа просим.
Лик: Подай, Господи.
Диакон: Христианския кончины живота нашего, безболезнены, непостыдны, мирны, и добраго ответа на Страшнем Судищи Христове, просим.
Лик: Подай, Господи.
Диакон: Соединение веры и причастие Святаго Духа испросивше, сами себе, и друг друга, и весь живот наш Христу Богу предадим.
Лик: Тебе, Господи.
Священник: И сподоби нас, Владыко, со дерзновением, неосужденно смети призывати Тебе, Небеснаго Бога Отца, и глаголати:
Лик: Отче наш, Иже еси на Небесех! Да святится Имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь, и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство, и сила, и слава, Отца и Сына и Святаго Духа, ныне и присно и во веки веков.
Лик: Аминь.
Священник: Мир всем.
Лик: И духови твоему.
Диакон: Главы ваша Господеви приклоните.
Лик: Тебе, Господи.
Священник молится: Благодарим Тя, Царю невидимый, Иже неисчетною Твоею силою вся содетельствовал еси, и множеством милости Твоея от небытия в бытие вся привел еси. Сам, Владыко, с небесе призри на подклоншыя Тебе главы своя, не бо подклониша плоти и крове, но Тебе страшному Богу. Ты убо, Владыко, предлежащая всем нам во благое изравняй, по коегождо своей потребе: плавающым сплавай, путешествующым спутешествуй, недугующыя исцели, врачу душ и телес.
Священник: Благодатию, и щедротами, и человеколюбием Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно и во веки веков.
Лик: Аминь.
Священник молится: Вонми, Господи Иисусе Христе Боже наш, от святаго жилища Твоего и от престола славы Царствия Твоего, и прииди во еже освятити нас, Иже горе со Отцем седяй, и зде нам невидимо спребываяй, и сподоби державною Твоею рукою преподати нам пречистое Тело Твое и честную Кровь, и нами всем людем.
Диакон: Вонмем.
Священник: Святая святым.
Лик: Един Свят, един Господь Иисус Христос, во славу Бога Отца. Аминь.
Лик: Хвалите Господа с небес, хвалите Его в вышних. Аллилуиа, аллилуиа, аллилуиа.
Диакон: Раздроби, владыко, святый хлеб.
Священник: Раздробляется и разделяется Агнец Божий, раздробляемый и неразделяемый, всегда ядомый и никогдаже иждиваемый, но причащающияся освящаяй.
Диакон, показуя орарем святый потир, глаголет: Исполни, владыко, святый потир.
Священник, взяв частицу, творит ею образ креста над потиром, говоря: Исполнение Духа Святаго. И влагает частицу в потир.
Диакон: Аминь. Благослови, владыко, теплоту.
Священник, благословляя, глаголет: Благословенна теплота святых Твоих, всегда, ныне и присно и во веки веков. Аминь.
Диакон вливает теплоту в потир, говоря: Теплота веры исполнь Духа Святаго. Аминь.
Священник: Диаконе, приступи.
Диакон: Преподаждь мне, владыко, честное и святое Тело Господа и Бога и Спаса нашего Иисуса Христа.
Священник: имярек, священнодиакону, преподается честное и святое и пречистое Тело Господа и Бога и Спаса нашего Иисуса Христа, во оставление грехов его и в жизнь вечную.
Чесное и пресвятое Тело Господа и Бога и Спаса нашего Иисуса Христа преподается мне, имярек, священнику, во оставление грехов моих и в жизнь вечную.
И приклонив главы, оба молятся: Верую, Господи, и исповедую, яко Ты еси воистинну Христос, Сын Бога живаго, пришедый в мир грешныя спасти, от нихже первый есмь аз. Еще верую, яко сие есть самое пречистое Тело Твое, и сия есть самая честная Кровь Твоя. Молюся убо Тебе: помилуй мя, и прости ми прегрешения моя, вольная и невольная, яже словом, яже делом, яже ведением и неведением, и сподоби мя неосужденно причаститися пречистых Твоих Таинств, во оставление грехов, и в жизнь вечную. Аминь.
Вечери Твоея тайныя днесь, Сыне Божий, причастника мя приими; не бо врагом Твоим тайну повем, ни лобзания ти дам, яко Иуда, но яко разбойник исповедаю Тя: помяни мя, Господи, во царствии Твоем.
Да не в суд или во осуждение будет мне причастие Святых Твоих Таин, Господи, но во исцеление души же и тела. Аминь.
И тако причащаются в руках держимого. После этого священник причащается из потира, говоря: Честныя и святыя крове Господа и Бога и Спаса нашего Иисуса Христа причащаюся аз, раб Божий, священник имярек, во оставление грехов моих и в жизнь вечную. Аминь.
Утирая уста и край потира платом, глаголет: Се прикоснуся устнам моим, и отимет беззакония моя, и грехи моя очистит. Диаконе, приступи.
Диакон подходит и говорит: Се прихожду к бессмертному Царю и Богу нашему. Преподаждь ми, владыко, честную и святую Кровь Господа и Бога и Спаса нашего Иисуса Христа.
Священник: Причащается раб Божий, диакон имярек, честныя и святыя Крове Господа и Бога и Спаса нашего Иисуса Христа, во оставление грехов своих и в жизнь вечную...Се прикоснуся устнам твоим, и отимет беззакония твоя, и грехи твоя очистит.
Причастившись, священник читает молитву: Благодарим Тя, Владыко Человеколюбче, Благодетелю душ наших, яко и в настоящий день сподобил еси нас небесных Твоих и бессмертных Таинств. Исправи наш путь, утверди ны во страсе Твоем вся, соблюди наш живот, утверди наша стопы, молитвами и моленьми славныя Богородицы и Приснодевы Марии, и всех святых Твоих.
И тако отверзают двери святаго олтаря.
Диакон, вынося Святую Чашу, возглашает: Со страхом Божиим и верою приступите!
Лик: Благословен Грядый во Имя Господне, Бог Господь и явися нам.
Священник, причащая каждого, глаголет: Причащается раб Божий, имярек, честнаго и святаго Тела и Крове Господа и Бога и Спаса нашего Иисуса Христа, во оставление грехов его и в жизнь вечную.
Диакон, вернувшись в алтарь, читает: Воскресение Христово видевше, поклонимся святому Господу Иисусу, Единому Безгрешному. Кресту Твоему поклоняемся, Христе, и святое воскресение Твое поем и славим, Ты бо еси Бог наш, разве Тебе иного не знаем, имя Твое именуем. Приидите вси вернии, поклонимся святому Христову воскресению, се бо прииде радость всему миру. Всегда благословяще Господа, поем воскресение Его, распятие бо претерпев, смертию смерть разруши.
Светися, светися, новый Иерусалиме, слава бо Господня на тебе возсия. Ликуй ныне и веселися, Сионе. Ты же Чистая, красуйся Богородице, о восстании Рождества Твоего.
О Пасха велия и священнейшая, Христе! О мудросте, и Слове Божий, и сило! Подавай нам истее Тебе причащатися, в невечернем дни Царствия Твоего.
Отирает святою губою дискос зело добре, глаголя: Омый, Господи, грехи поминавшихся зде Кровию Твоею Честною, молитвами святых Твоих.
Священник: Спаси, Боже, люди Твоя и благослови достояние Твое.
Обратившися к святей трапезе, священник кадит трижды глаголя в себе: Вознесися на небеса, Боже, и по всей земли слава Твоя.
Лик: Видехом Свет Истинный,/ прияхом Духа Небеснаго,/ обретохом веру истинную,/ Нераздельней Троице покланяемся./ Та бо нас спасла есть.
Священник: Благословен Бог наш...
Священник возгласно: Всегда, ныне и присно и во веки веков.
Лик: Аминь. Да исполнятся уста наша/ хваления Твоего, Господи,/ яко да поем славу Твою,/ яко сподобил еси нас причаститися/ Святым Твоим, Божественным, Безсмертным и Животворящим Тайнам;/ соблюди нас во Твоей святыни,/ весь день поучатися правде Твоей./ Аллилуиа, аллилуиа, аллилуиа.
Диакон: Прости приимше Божественных, Святых, Пречистых, Безсмертных, Небесных и Животворящих, Страшных Христовых Тайн, достойно благодарим Господа.
Лик: Господи, помилуй.
Диакон: Заступи, спаси, помилуй и сохрани нас, Боже, Твоею благодатию.
Лик: Господи, помилуй.
Диакон: День весь совершен, свят, мирен и безгрешен испросивше, сами себе, и друг друга, и весь живот наш Христу Богу предадим.
Лик: Тебе, Господи.
Священник: Яко Ты еси Освящение наше, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
Священник: С миром изыдем.
Лик: О имени Господни.
Диакон: Господу помолимся.
Лик: Господи, помилуй.
Священник: Благословляяй благословящия Тя, Господи, и освящаяй на Тя уповающия, спаси люди Твоя и благослови достояние Твое, исполнение Церкве Твоея сохрани, освяти любящия благолепие дому Твоего; Ты тех возпрослави Божественною Твоею силою, и не остави нас, уповающих на Тя. Мир мирови Твоему даруй. Церквам Твоим, священником, воинству и всем людем Твоим. Яко всякое даяние благо, и всяк дар совершен свыше есть, сходяй от Тебе, Отца Светов; и Тебе славу, и благодарение, и поклонение возсылаем. Отцу и Сыну и Святому Духу, ныне и присно и во веки веков.
Лик: Аминь. Буди Имя Господне благословено отныне и до века (Трижды).
Лик: Благословлю Господа на всякое время,/ выну хвала Его во устех моих. О Господе похвалится душа моя,/ да услышат кротции, и возвеселятся. Возвеличите Господа со мною,/ и вознесем Имя Его вкупе. Взысках Господа, и услыша мя,/ и от всех скорбей моих избави мя. Приступите к Нему и просветитеся,/ и лица ваша не постыдятся. Сей нищий воззва, и Господь услыша и,/ и от всех скорбей его спасе и. Ополчится ангел Господень окрест боящихся Его,/ и избавит их. Вкусите, и видите, яко благ Господь:/ блажен муж, иже уповает Нань. Бойтеся Господа вси святии Его,/ яко несть лишения боящимся Его. Богатии обнищаша и взалкаша:/ взыскающии же Господа не лишатся всякаго блага. Приидите, чада, послушайте мене,/ страху Господню научу вас. Кто есть человек хотяй живот,/ любяй дни видети благи? Удержи язык твой от зла,/ и устне твои, еже не глаголати льсти. Уклонися от зла, и сотвори благо,/ взыщи мира, и пожени и. Очи Господни на праведныя,/ и уши Его в молитву их. Лице же Господне на творящия злая,/ еже потребити от земли память их. Воззваша праведнии, и Господь услыша их,/ и от всех скорбей их избави их. Близ Господь сокрушенных сердцем, / и смиренныя духом спасет. Многи скорби праведным,/ и от всех их избавит я Господь. Хранит Господь вся кости их,/ ни едина от них сокрушится. Смерть грешников люта, / и ненавидящии праведнаго прегрешат. Избавит Господь души раб Своих,/ и не прегрешат вси уповающий на Него.
Молитва, глаголемая внегда потребити святая: Исполнение закона и пророков Сам сый, Христе Боже наш, исполнивый все отеческое смотрение, исполни радости и веселия сердца наша, всегда, ныне и присно и во веки веков.
Священник: Благословение Господне на вас, Того благодатию и человеколюбием, всегда, ныне и присно и во веки веков.
Лик: Аминь.
Священник: Слава Тебе, Христе Боже, Упование наше, слава Тебе.
Лик: Слава Отцу и Сыну и Святому Духу, и ныне и присно и во веки веков. Аминь. Господи, помилуй (Трижды). Благослови.
Священник произносит отпуст (здесь воскресный): Воскресый из мертвых, Христос, истинный Бог наш, молитвами Пречистыя Своея Матере, святых славных и всехвальиых Апостол, иже во святых отца нашего Иоанна, архиепископа Константина града, Златоустаго и святаго (храма и святого, которого память в этот день), святых и праведных Богоотец Иоакима и Анны и всех святых, помилует и спасет нас, яко Благ и Человеколюбец.
Великаго Господина и Отца нашего имярек, Святейшаго Патриарха Московскаго и всея Руси, и Господина нашего (Высоко)преосвященнейшаго имярек, митрополита Санкт-Петербургскаго и Ладожскаго, братию святаго храма сего и вся православныя христианы, Господи, сохрани их на многая лета.